لقمة العيش هي التي بتصحي الأب المسن من نومه بدري ليسعى الى عمله او الى وظيفته وابنه شحط طول بعرض نايم بعد الفجر عشان كان سهران على القهوة
   
   لقمة العيش هي اللي بتخلي سواقين الميكروباصات يسبوا الدين لبعض عشان زبون ركب في العربية اللي معليهاش الدور
   
   هي اللي بتخلي السواقين يسبوا لأمناء الشرطة بعد ما يغمزوهم بخمسه جنيه اصطباحه عشان يحملوا من بره الموقف
   
   لقمة العيش هي اللي بتخلي ست كبيرة تركب قطر سبعة وربع الصبح وتشيل قفصين على راسها وتروح تتخانق مع صاحب المحل اللي بتفرش ادامه واللي بيرش ميه قبل ما تيجي وبرضه بتقعد تبيع ومفيش مانع ياخد منها طمطمايه لمجرد الاستغلال
   
   لقمة العيش هي اللي بتخلي محصل الكهربا يديك الباقي ربع جنيه بربع جنيه احتمال تقول له طب خلاص يا ريس خلي الباقي
   
   
   لقمة العيش هي اللي بتخلي بتاع الدليفري يبص في الفاتورة قبل ما يطلع بالاوردر عشان يخمن طول الطريق هيطلع من التوصيله دي بكام
   
   لقمة العيش هي اللي بتخلي ماسح الاحذية يفضل قاعد على الارض ليل ونهار منتهى أمله جزمة زبون نضيف مايفصلوش في ربع جنيه ويقول له : جنيه ليه يعني !؟ هي علبة الورنيش بكام
   
   لقمة العيش هي اللي بتخلي الزبال يشيل الزبالة على كتفه مع ان صاحبها بيمسكها بطراطيف صوابعه
   
   لقمة العيش هي اللي بتخلي الإكرامية أهم من المرتب عند أي موظف يعمل في خدمة المواطنين .. اللي كانوا مواطنين
   
   لقمة العيش هي اللي بتخلي عمال السوبر ماركت يتخانقوا على توصيل الأكياس لشنط العربيات .. وخصوصا لو الزبون خليجي
   
   لقمة العيش هي اللي بتخلي سواق التاكسي دايما معهوش فكه .. خصوصا لو اللي راكبه معاه بنت او ست
   
   لقمة العيش لما بتبقى بقايا لقمة عيش بتخلي الأب ينزل يدور لابنه على شنطة مدرسة
    في الباله ويغسلها وينشرها ويديهاله على انها جديدة.. والواد ميرضاش ياخدها
   
   لقمة العيش بتخلي السايبر مان يعامل العيال الصغيره على انهم مهندسين كمبيوتر .. وبرضه بيستغفلوه في الوقت
   
   لقمة العيش هي اللي بتخلي الصايع باشا طالما بيدفع تيبس ، وبتخلي المدام انسة طالما بتشتري علبة منديل في اشارة مرور من واحدة جوزها ميت من عشرين سنه ومعاها صورة شهادة الوفاة
   
   لقمة العيش هي اللي بتخلي راجل طويل عريض شنبه يقف عليه الصقر ويمدد يعمل بلياتشو ويلغمط وشه بالوان الطيف ويضحك حتى لو بيفكر في دوا ابنه اللي معرفش يصرفه من التأمين الصحي
   
   لقمة العيش هي اللي بتخلي بتاع الروبابيكيا يمشي ينادي على حنفيات مكسورة ويبدلها بجلدة انبوبه .. والزبون اللي كسبان طبعا
   
   لقمة العيش هي اللي بتخلي الفران يقف في عز الحر ادام الفرن والناس قاعدة في التكييف تنفخ من الحر وتكلم بتوع الصيانه يجوا يكشفوا على التكييف .. مبقاش كوول خالص
   
   لقمة العيش هي اللي بتخلي شاب خريج حقوق يقف يبيع بمب وصواريخ ومقالب والعاب سحرية ادام المولات ..ولما يكسب يجيب موبايل ... واتكلم ودش الدقيقة بخمسين قرش
   
   لقمة العيش هي اللي بتخلي رصيف جامع الفتح سوق ليلي تلاقي فيه كل حاجة وكأنها ببلاش .. والمرافق تيجي .. كله يجري بالبضاعة .. الأمين جاي .. الأمين قبض .. كله يرجع الى قواعده سالما
   
   لقمة العيش هي اللي خلت مبارك وكلابه يسرقوا الشعب خمسة وعشرين سنة وميقولش لأ
   
   
   
   
    abdelrahman_gado@yahoo.com
   http://egyptianscorner.blogspot.com