زعلان إنته عللشعب.. لو مقهور علقاضي

سمير عبيد               Saturday 02-06 -2007

ياوطن يا بو الوفه
كَللي إشعجب راضي

يردون تشريحك بالعَجَل
عدهم حلم ماضي

حضنك ثلج ما بيه دفو
وعن الأهل متغاضي

زعلان إنته عللشعب
لو مقهور علقاضي

اللي نطه كل النفط
وخلّه البلد فاضي؟
،،
لا تزعل يا وطن
من تزعل تغث الفرات
وينشف نهر دجله

ويصير الشعب
مثل إبن اثلثتشر
محتاج للحجلة*
***
الشعب موشعب
لوعاف الوطن منهوب

الشعب موشعب
لو نام إبسريره والوطن مصيوب

الشعب مو شعب
لو قِبل يركب بالكِعد.. والكِعد معيوب

الشعب مو شعب
لو قبل بالقائد الغدّار.. وتآمر عللمهيوب

الشعب مو شعب
لو صدّك ضحكة الصفرا.. ونسه يكشف علكَلوب

والشعب موشعب
لو نكر جيله وراح..يفتر يدك بالبوب
***
وعيب التدكَدك ببواب الدول
عن حل وقيادة ورئيس


القادة عدنه
والشرف عدنه
والعِلم عدنه
بس إبشرط تبعد عنهم إبليس

وتبعد أجلاب الإجت من كل كتر
وتجرّب إصكَور الماتاكل فطيس
****
حرام الدجاج إيصير إديوج
وحرام الحِداه إتقود الصكَر

وحرام المخنّث بجيس السيف
وكفره من يسرّج علشكَر

وهم إسمعت فد يوم لاله
تنور الكون وتكَول آني الكَمر ..؟

وهم تعتقد بيه خير
اليقود الناس من شبّاج الهَمر؟
***
.....ياوطن
زعلان إنته عللشعب
لو مقهور علقاضي

اللي نطه كل النفط
وخلّه البلد فاضي؟

[email protected]
www.samirobeid.net


ـــــــــــــــــــ

الكعد: هو إسم الزورق الصغير باللهجة العراقية الجنوبية، وله إسم آخر وهو (البلم) بلهجة أهالي بغداد
الحجلة: هي وسيلة تساعد الطفل الصغير على تعلّم المشي.. وعادة ما تصنع من الخشب


تم طباعة هذه المادة من موقع الركن الأخضر
http://www.grenc.com/show_article_main.cfm?id=7220